బాబూజీ - లాలాజీ గురించి - 4
బాబూజీ బోధలు
"అడిగితే తప్ప ఎవ్వరికీ సలహా ఇవ్వకండి, లేకపోతే పర్యవసానాలు చెడుగా ఉండే అవకాశం ఉంటుంది."
"ఎవరిలోనైనా యేదైనా దోషం కనిపిస్తే, ఆ వ్యక్తి ఆ దోషం నుండి విముక్తుడవ్వాలని ప్రార్థించండి."
లాలాజీ స్వయంగా ఎప్పుడూ నేరుగా ఎవరినీ చెడు అలవాట్లను మానమని చెప్పేవారు కాదు. ఆయన సాంగత్యంలో ఉన్న అనతికాలంలో వాళ్ళల్లో ఉండే దురలవాట్లు, క్లేశాలూ అన్నీ వాటంతటవే విడిచిపోయేవి.
ఈ ధ్యాన పద్ధతిని గురించి వ్యాఖ్యానిస్తూ, "అగ్నికి దగ్గరగా కూర్చుంటే వెచ్చగా ఉంటుంది; ఐసుకు దగ్గరగా కూర్చుంటే చల్లగా ఉంటుంది; అటువంటప్పుడూ క్రమశిక్షణతోనూ, సత్ప్రవర్తనతోనూ పరిపూర్ణుడైన వ్యక్తితో కూర్చున్నప్పుడు వ్యక్తిలో పరివర్తన ఎందుకు రాదు?" అన్నారు.
కోరికలను తగ్గించుకోమని ఎప్పుడూ చెప్తూండేవారు.
"పాత వస్తువులతో పని జరుగుతున్నప్పుడు కొత్త వస్తువును కొనకండి" అనేవారు.
నిజాయితీగా డబ్బు సంపాదించదాన్ని ఆయన వ్యతిరేకించేవారు కాదు, కానీ ఆ డబ్బును ఇతరులపై ఖర్చు పెట్టమని నొక్కి చెప్పేవారు. మత్తుపదార్థాలను, వ్యభిచారాన్ని పూర్తిగా నిషిద్ధం అనేవారు. ఈ విషయంలో తన అనుచరులను తమ మనసును నమ్మద్దనేవారు. ఆయన ప్రకారం ఇంద్రియసుఖాలకు బానిసలుగా ఉండేవారు, దురాశ కలిగినవారు పారమార్థికమైన పనులు చేయలేరనేవారు.
ఆయన అభిప్రాయం ప్రకారం ప్రదర్శన అనేది అయోగ్యత అనేవారు. అందుకు భిన్నంగా ఉన్నదున్నట్లుగా సత్యాన్ని పలకడం చాలా మంచిదనేవారు. ఆయన దృష్టిలో నిజమైన క్రమశిక్షణ, నిజమైన సత్ప్రవర్తన అంటే హృదయంలో ఉన్నదే నాలుకమీద ఉండాలన్న దృఢవిశ్వాసం, కలిగి ఉండేవారు. అభ్యాసి అంతరంగ స్థితి, బాహ్య స్థితి రెండూ ఒక్కటై ఉండాలి. ఇతరుల దోషాలను గురించి మాట్లాడుకోవటం వారికిష్టం ఉండేది కాదు. ఒకవేళ అటువంటి చర్చ చేయవలసిన పరిస్థితి వస్తే, మౌనంగా ఉండిపోయేవారు.
అద్భుతాలు ప్రదర్శించడం ఆయనకు విపరీతమైన విసుగు పుట్టించేది. ఎవరికైనా సాధనలో సిద్ధి కలిగిందంటే వెంటనే తొలగించేసేవారు. అలాగే ఆహాన్ని ఎప్పుడూ పెరగనిచ్చేవారు కాదు. సాధకులందరినీ తమ గమ్యాన్ని చేరుకునే వరకూ, తమలో క్రమశిక్షణ పరిపూర్ణ స్థితికి వచ్చేవరకూ ఈ సిద్ధులకు దూరంగా ఉండమనేవారు. సాధకుడు గమ్యాన్ని చేరుకున్న తరువాత ఆ సాధకుడు చేసే చేష్టలన్నీ అప్రయత్నంగానే అద్భుతాలుగా మారతాయి. ఆయన దృష్టిలో, ఒక మహాత్ముడు చేయగల అత్యద్భుత కార్యం ఏమిటంటే, పాశవికంగా ఉండే మానవుడిని పరిపూర్ణ మానవునిగా పరివర్తింప జేయడం. లాలాజీకి తన సిద్ధులపై సంపూర్ణ ఆధిపత్యం ఉందన్న సత్యాన్ని నిరాకరించడానికి లేదు; కానీ వారు ఆ శక్తులనెప్పుడూ వినియోగించేవారు కాదు.
(సశేషం ... )
కామెంట్‌లు లేవు:
కామెంట్‌ను పోస్ట్ చేయండి