మీలోని పసి హృదయాన్ని అలాగే నిలుపుకోండి పూజ్య దాజీ 2026 నూతన సంవత్సర సందేశం పూజ్య బాబూజీ అందించిన విస్పర్శ్ ఫ్రమ్ ది బ్రైటర్ వరల్డ్ సందేశ స్ఫూర్తితో
(పూజ్య దాజీ ఆంగ్ల సందేశానికి తెలుగు అనువాదం)
యహీ దిల్ హై జానమ్, మాసూమియత్ మే ఖోజా తూ
మీరు గందరగోళంలో పడిపోతే అమాయకంగా మారిపోండి. ఆత్మ ఎక్కడ నివసిస్తుందో అదే హృదయం. ప్రియతమలారా, మిమ్మల్ని మీరు సరళత్వంలోకి సాగిపోనివ్వండి.
ప్రియమైన సోదరసోదరీమణుల్లారా,
మనం 2026 వ సంవత్సరంలోకి సమీపిస్తున్న తరుణంలో మీ అందరూ మన మాస్టర్లు ఎప్పుడూ చెప్తూ ఉండే, మీ పసి హృదయాన్నిఅలాగే నిలుపుకోండి అనే సందేశాన్ని కాస్త ఆగి మననం చేసుకోవాలని కోరుతున్నాను. సరళమైన ఈ ఒక్క మార్గదర్శక సూచన మొత్తం ఆధ్యాత్మిక జీవనానికి కీలకమైనది. కానీ ఈ పాఠం, ఎప్పుడూ కంటే ఇప్పుడు ఎందుకు ముఖ్యమో, మన జాతి అత్యున్నత ఆశయానికి ఎందుకు కీలకమైనదో మీతో పంచుకోదలచుకున్నాను.
ఈ లోకమంతా ఒకే కుటుంబం లేక వసుధైవ కుటుంబకం అంటారు. ఇది మన ప్రాచీన భారత మాత సందేశం. మనకీ పలుకులు పలకడం అంటే గర్వపడుతూ ఉంటాం. పలు దేశాలు ఒకచోట సమావేశమైనప్పుడు ఈ సందేశాన్ని తలచుకుంటూ ఉంటాం. కాని ఇక్కడ మనం కాస్త ఆగి ప్రశ్నించుకోవలసిన ప్రశ్న ఒకటుంది: ఇది మన ఇళ్ళల్లోనే సాధించుకోలేనప్పుడు, ఇక ప్రపంచంలో సాధ్యపడే అవకశశాం ఉందా అని?
మీ కుటుంబాన్ని గరించే ఆలోచించండి. ముగ్గురో, నలుగురో లేక అంతా కంటే ఎక్కువో ఉన్నారనుకుందాం. ఈ చిన్న కుటుంబంలోనే మీరు బాగా ప్రేమించే వ్యక్తిని గమనించగలుగుతున్నారా? అవతలి వ్యక్తి ఎలా ప్రవర్తించాడో లేక ఎలా ప్రవర్తించలేదో, మీ మనసులో లెక్కలు వేసుకుంటున్నారా? "ఫలానా ఆవిడ నన్ను 2019 లో ఇలా అంది." "నా త్యాగానికి అతనెప్పుడూ విలువ ఇవ్వలేదు." "నేను చేసిన పనిని ఎప్పుడూ మెచ్చుకోరు." కొన్నిసార్లు ఇలాటి లెక్కలు మన మనసుల్లో తెలియకుండానే వేసుకుంటూ ఉంటాం. ఇలా మనం మనసుల్లో లెక్కలేసుకుంటున్నంత కాలం, వసుధైవ కుటుంబకం అనేది ఒక అందమైన వాక్యంగానే మిగిలిపోతుంది.
ఇప్పుడొక పసిమనసును చూడండి. పసిమనసు సంపూర్ణంగా ఉంటుంది. వాళ్ళు నీళ్ళల్లో ఆడుకుంటున్నప్పుడు హైడ్రోజెన్ గురించి. ఆక్సిజన్ గురించి ఆలోచించరు; హాయిగా ఆడుకుంటారంతే. షరతులుండవు, హద్దులుండవు, ప్రేమించే సమయంలో పాత జ్ఞాపకాలుంచుకోరు. పసిపిల్లలు "నువ్వు ఇలా ఉంటేనే ప్రేమిస్తాను" అని షరతులు పెట్టరు. నిన్న తగిలిన దెబ్బలు గుర్తుంచుకోరు. పసి హృదయం అంటే ఇబ్బందులకు దూరంగా ఉండేది, జీవితంలో కష్టాల నుండి క్షేమగా ఉండేది. కుటుంబాన్ని నిజంగా కుటుంబంగా మార్చేది ఈ హృదయమే; ఆ కుటుంబం చిన్నది కావచ్చు లేక ప్రపంచమంతా ఆవరించి ఉండవచ్చు.
ఆత్మ యొక్క సింహాసనం
ఆత్మ నివసించేది ఈ హృదయమేనని మన మాస్టర్లు గుర్తు చేస్తూ ఉంటారు; అన్నిటికీ అతీతంగా ఎదగాలన్న ఆకాంక్షతో ఉన్న జీవుడి తత్త్వసారం ఈ హృదయం. విషయం అంతా ఈ స్థాయిలోనే ఉంది. మనం ఏమి సాధించామన్నది కాదు, మనం ఎంత ఆధ్యాత్మికంగా కనిపిస్తున్నామన్నది కాదు, ఎంత కాలం ఒక ఆధ్యాత్మిక పాఠాన్ని అనుసరించామన్నది కాదు. మన హృదయాలు ఎంత స్వచ్ఛంగా, ఎంత సరళంగా, ఎంత పసితనంతో నిండి ఉన్నాయన్నదే ముఖ్యం.
పసివాడు నేర్పించకుండా ఎలా తెలుసుకుంటాడు ?
సాధారణమైనవాటిని చూసి ఆశ్చర్యపోవడం. నిదర్శనాలు అడుగకుండా నమ్మగలగడం. మనసులో లెక్కలలేకుండా ప్రేమించగలగడం. వ్యూహాల్లేకుండా ఉండగలగడం. జ్ఞాపకం పెట్టుకోకుండా క్షమించగలగడం. యేమీ ఆశించకుండా ఇవ్వగలగడం.
ఈ జాబితాని జాగ్రత్తగా పరిశీలించండి. వసుధైవ కుటుంబకం అనేది మన నుండి ఆశించేది సరిగ్గా ఇదే కదా? తత్త్వశాస్త్రాల నుండి, క్రమశిక్షణ ద్వారా మనం నేర్చుకోవాలని చేస్తున్న కృషి వీటి కోసమే కదా?
కాఠిన్యం మనం పోగొట్టుకోవాలి
జీవితం మనలను కఠినంగా తయారు చేస్తుంది. నిరాశలు హృదయాన్ని కఠినంగా చేస్తాయి. బాధ్యతలు కావచాలుగా మారతాయి. చివరికి ఆధ్యాత్మిక ఎదుగుదల కోసం చేసే సాధన కూడా, సమర్పణకు గాకుండా ఆర్జించడం కోసం చేస్తే అది కూడా ఏర్పడే కాఠినయానికి కారణం అవుతుంది. నెమ్మదిగా, తెలియకుండా మనం మనసుల్లో లెక్కలు వేసుకోవడం ప్రారంభిస్తాం. అర్థం చేసుకోని జీవిత భాగస్వామి. ఫోన్ కాల చేయని సంతానం. నిరాకరించిన తల్లిదండ్రులు. సహకరించని తోబుట్టువు. మనసులో పడే ఉద్వేగపరమైన ప్రతీ లెక్క, మనం బాగా ప్రేమించే వ్యక్తులకు మనకు మధ్య ఏర్పడే అడ్డుగోడలో ఒక్కో ఇటుకలా పని చేస్తుంది.
నలుగురే ఉన్న మన ఈ చిన్న కుటుంబంలోనే ఈ అవరోధాలను తొలగించుకోలేకపోతే, దేశాల మధ్య, మతాల మధ్య, జాతుల మధ్య ఉన్న హద్దులను చెరపగలిగే పరిస్థితి ఎక్కడుంటుంది?
2026 లోని రహస్యం
2026 అందించే రహస్యం ఇదే: భగవంతుడిని సమీపించేది ఆధ్యాత్మికానుభవాలను వెంట పడటమూ కాదు లేక ఆధ్యాత్మిక జ్ఞానాన్ని బాగా ప్రోగుచేసుకోవడమూ కాదు. పసి హృదయాల్లా తయారవడం మార్గం. ఒక పువ్వుని ఆశ్చర్యంగా చూడటం; సిగ్గు పడకుండా ఏడవగలగడం; కారణం లేకుండా నవ్వగలగడం; భయం లేకుండా ప్రేమించగలగడం; మనసులో లెక్కల్లేకుండా క్షమించగలగడం.
భగవంతునితో అనుసంధానం సాధ్యం చేసే హృదయమే, మనలను పరస్పరం కలుపుతుంది. భగవంతునితో అనుసంధానమవడానికి, ఒక హృదయం, కుటుంబంతో కలవడానికి మరో హృదయం అని రెండు హృదయాలు అవసరం లేదు. కావలసినది ఒక్కటే హృదయం, అది - పసి హృదయం.
ప్రపంచం ఎదగమంటుంది; గంభీరంగా ఉండమంటుంది; నిన్ను నివ్వు కాపాడుకో అంటుంది; ఆధ్యాత్మిక ప్రగతిని కొలుచుకోమంటుంది. కానీ మాస్టర్లు మరోలా మాట్లాడుతున్నారు: "పసి పిల్లల్లా తయారవ్వండి" ; "మూలానికి తిరుగు ప్రయాణం చేసి, తాజా జీవితాన్ని పొందండి" అంటారు. "ప్రతీదీ హృదయంపై ఆధారపడుంది" అంటారు మాస్టర్లు.
ఈ సంవత్సరంలో మీరు చేయడానికొక అభ్యాసం
ఈ సంవత్సరాన్ని మీలోని పసివాళ్ళ స్వభావాన్ని పునరుద్ధరించుకోవడం ద్వారా మీ ఇంట్లో ప్రారంభించండి. మీరు ధ్యానానికి కూర్చున్నప్పుడు, ఖాళీ చేతులతోనూ, తెరచిన హృదయంతోనూ, రండి; ఒక పసివాడు తన తల్లిదండ్రుల వద్దకు యే లెక్కలూ, అజెండా లేకుండా వచ్చినట్లు రండి. ధ్యానం నుండి లేచిన తరువాత అదే హృదయంతో బ్రేక్ ఫాస్ట్ చేయండి, మీ భాగస్వామి వద్దకు వెళ్ళండి; మీ పిల్లల వద్దకు వెళ్ళండి; మీ తల్లిదండ్రుల వద్దకు వెళ్ళండి.
ఎవరు ఏమి అన్నారో వాటిని మనసులో పెట్టుకోకండి. గతంలో ఎవరైనా బాధ పెట్టుమటే మనసులో నుండి తీసేయండి. మీరు ఆశించినట్లుగా ఉండటం వల్ల ఇతరులు మీ ప్రేమను పొందాలని అనుకోవద్దు.
ఇతరులకు సేవ చేసేటప్పుడు, పిల్లలు తమ ఆటబొమ్మలను మనకు చూపిస్తూ ఆనందిస్తున్నట్లుగా సేవ చేయండి; పేరు కోసం కానీ గుర్తింపు కోసం గాని చేయకుండా కేవలం పంచుకోవడం అనే ఆనందం కోసం సేవ చేయండి. సంబంధాల్లో ఇబ్బందులొచ్చినప్పుడు చిన పిల్లవాడు నమ్మినట్లు నమ్మండి; అవతలి వ్యక్తి అర్హుడని కాదు, అందుకు ఋజువులున్నాయని కాదు; నమ్మాడమే మీ స్వభావం కాబట్టి, మీ హృదయంలో అస్సలు అనుమానం గూడు కట్టుకోలేదు కాబట్టి.
పరివర్తనా తరంగం
ఇది గనుక మనం చేయగలిగితే అసాధారణమైనది జరుగుతుంది. మనింట్లో మొదలైన వసుధైవ కుటుంబకం బయటకు ప్రసరించడం ప్రారంభమవుతుంది. మనసుల్లో లెక్కలేసుకోని కుటుంబం లెక్కలేసుకోని సమాజంగా తయారవుతుంది. బేషరతుగా ప్రేమించగలిగే సమాజం బేషరతుగా ప్రేమించే జాతికి బీజం అవుతుంది. నిజంగా ఒక్క కుటుంబంలా తయారైన దేశం, అప్పుడు ప్రపంచాన్ని కూడా ఒక్క కుటుంబంగా ఉండాలన్న ఆహ్వానాన్ని త్రికరణ శుద్ధిగా ఇవ్వగలుగుతుంది.
పరివర్తన ఎక్కడో అక్కడ ప్రారంభమవ్వాలి. అది మీ హృదయంలో ప్రారంభం కానివ్వండి. మీ ఇంట్లో మొదలు కానివ్వండి. ఈ సంవత్సరం ప్రారంభం కానివ్వండి.
ఈ సందేశానికి స్ఫూర్తినిచ్చిన విస్పర్ సందేశం
ఈ భావాలను నాలో ప్రేరణ కలిగించిన, బాబూజీ దివ్యలోకం నుండి అందించిన సందేశాల్లో ఒక సందేశం పరిశీలిద్దాం.
సోమవారం, అక్టోబర్ 18, 2004 - ఊయదయం 10:00 గంటలు
"నీకు హాని కలుగకుండా క్షేమంగా ఉంచిన నీ పసి హృదయాన్ని నిలుపుకో. ఈ విషయాన్ని మన సోదరులందరికీ ప్రతీ ఒక్కరికీ చెప్పవచ్చు: ఈ ఆత్మ నివాసం ఉండేది ఈ హృదయంలోనే. అన్నిటికీ అతీతంగా ఉండే పరిస్థితిని తీవ్రంగా అన్వేషించే జీవుడి యదార్థ తత్త్వం ఇదే. ప్రతీదీ ఆధారపడున్నది ఈ స్థాయిలోనే. పసిపిల్లల్లా ఉండండి. జీవితం మిమ్మల్ని కఠినంగా తయారు చేసి, మూలానికి దూరం చేసి ఉంటే, తిరిగి మళ్ళీ పునరుద్ధరణ జరిగేది ఈ పసి హృదయం ద్వారానే. అసలైన విషయం మీద మీరు మీ దృష్టిని సారించడానికి సహకరించడమే ఈ ఆధ్యాత్మిక యాత్ర యొక్క లక్ష్యం.
"నీలో ఈ అవసరాన్ని నువ్వు అనుభూతి చెందుతున్నావు. నీ ప్రాపంచిక జీవనం నీకు సంతోషం కలిగించవచ్చు, కానీ నీలో యేదో శూన్యత కలిగించవచ్చు కూడా, యేదో లేని వెలితి అనుభూతి చెందుతారు. కానీ అంతులేకుండా చేసే సాధన ఆ దివ్యత్వంతో ఏకమైపోవాలన్న తీవ్ర తపన మరింత మరింత ఎక్కువగా ఉపరితలంపైకి వాస్తు ఉంటుంది. సుదీర్ఘ అన్వేషణ యొక్క చరమాంకం ఇదే, తిరుగాడుతూ ఉండగా అన్వేషకునికి సత్యము దర్శనం ఇస్తుంది.
"ఈ రంగంలో ప్రతీదీ చాలా తేలిక: నువ్వు చేయవలసినదల్లా కావాలనుకోవడం, సరైన విధంగా సాధన చేయడం, సమస్యలతో నిండిన నకిలీ జీవితం వల్ల నిజమైన గమ్యానికి దూరంగా ఉంచడంలో హక్కులను కోల్పోయినప్పుడు పోగొట్టుకున్న వివేకాన్ని గుర్తుంచుకోవడం."
మనం మరచిపోయిన సరళత్వం
ప్రతీ విషయం చాలా తేలికంటున్నారు బాబూజీ. కావాలనుకోవడం, సరిగ్గా సాధన చేయడం, కోల్పోయిన వివేకాన్ని తిరిగి స్వాధీనం చేసుకోవడం, ఇంతే మనకు కావలసినది. ఇక్కడ వివేకం అంటే పసివాడి వివేకం; లెక్కలేసుకోకుండా ప్రేమించడం; గుర్తుంచుకోకుండా క్షమించగలగడం; యేమీ ఆశించకుండా ఇవ్వగలగడం. ఇటువంటి వివేకం వసుధైవ కుటుంబకం అనేది సాధ్యపడేలా చేస్తుంది. మనం యే హరదాయంతో జన్మించామో అక్కడే ఈ వివేకం ఉంది; దాన్ని మరలా ఇప్పుడు స్వాధీనం చేసుకోవాలనుకోవచ్చు.
ఈ 2026 వ సంవత్సరం మిమ్మల్ని మీరు మరలా సరళంగా తయారయ్యేలా అనుకూలించనివ్వండి. ఈ సంవత్సరం మీరు హాయిగా నవ్వగలగాలి, స్వేచ్ఛగా ఏడవగలగాలి, ఎల్లల్లేకుండా ప్రేమించగలగాలి, ప్రగాఢంగా నమ్మగలగాలి. ఈ సంవత్సరం మీరు బాగా ప్రేమించేవారి పట్ల, బహుశా కొన్ని దశాబ్దాలు మనసులో ఏర్పరచుకున్న లెక్కలను కాల్చివేయండి. ఈ సంవత్సరం ఎలా ఉండాలంటే, సాధన చేసేది యేదో సాధించాలని కాకుండా, అంతరంగంలో ఎప్పుడూ ఉన్న, ఎప్పుడూ వదిలిపెట్టని ఆ దివ్యమైన పసివాడిని తిరిగి కనుగొనాలని చేయడం. ఆ పసిహృదయం అక్కడే కనుగొనబడాలని, ఆదరించబడాలని, గౌరవించబడాలని, జీవించాలని వేచి ఉన్నది.
ఒకే గమ్యం, ఒకే హృదయం
మీరు తపిస్తున్న యోగస్థితి, మీరు ప్రార్థిస్తున్న లయావస్థ, మీరు అభ్యాసం చేస్తున్న అతీత స్థితి, అన్నీ ఈ పసి హృదయంలో దాగి ఉన్నాయి. అలాగే వసుధైవ కుటుంబకంలో కూడా దాగి ఉన్నాయి. ఈ రెండూ రెండు గమ్యాలు కావు. రెండూ ఒక్కటే. దివ్యత్వంలో లయమవగలిగే హృదయం కుటుంబంలో కూడా లయమవగలదు. భగవంతుని పట్ల ఎటువంటి లెక్కలు ఉంచుకోని హృదయం, జీవిత భాగస్వామి పట్ల, సంతానం పట్ల, తోబుట్టువుల పట్ల, తల్లిదండ్రుల పట్ల ఎటువంటి లెక్కలూ ఉంచుకోదు.
ఆ పసి హృదయం మీరే. ఎప్పుడూ అలాగే ఉన్నారు. ఎప్పటికీ అలాగే ఉంటారు కూడా.
హ్యాపీ న్యూ ఇయర్ 2026!
ప్రియతమలారా, ఎక్కడ గందరగోళంగా ఉంటుందో, అక్కడ అమాయకంగా మారిపోదాం.
యహీ దిల్ హై జానమ్, మాసూమియత్ మే ఖోజా తూ
పూజ్య దాజీ ఇచ్చిన ఆంగ్ల సందేశం కోసం ఇక్కడ క్లిక్ చేయండి
