పూజ్య చారీజీ స్మృతిలో ...

 

పూజ్య చారీజీ స్మృతిలో ... 

పరమపూజ్య పార్థసారథి రాజగోపాలాచారీజీ, ఆరడుగుల ఆజానుబాహుడు; ఒక దివ్య పురుషుడు; వారిలో దివ్యత్వం కాదు, దివ్యత్వంలోనే వారున్నట్లుగా దేదీప్యమానంగా మయిమరపించే చిరునవ్వుతో ఎప్పుడూ ప్రకాశిస్తూ ఉండేవారు. వారి కంఠస్వరం గంభీరంగా, సింహగర్జనలా ఉండేది. వారు మాట్లాడిన విషయం ప్రతీ హృదయంలోనూ చొచ్చుకుపోయి తన పని పూర్త చేసేది; వారు మాట్లాడే భాష అర్థంకాని వారి హృదయంలో కూడా చోటు చేసుకుని వారికి అందవలసిన సందేశం అర్థమయ్యేట్లుగా ఉండేది. మా అమ్మమ్మగారు, ఇంగ్లీషు అస్సలు అర్థంకాని  మనిషి, చారీజీని ఎప్పుడూ చూడని మనిషి, ధ్యానం అంటే అవగాహన లేని 80 సంవత్సరాల వృద్ధురాలు, "ఒరేయ్ ఆయన క్యాసెట్ పెట్టరా, ఆయన కంఠస్వరం బాగుంటుంది.. "అంటూ వారి ఆంగ్ల ప్రసంగాలు వింటూండేవారు. అదీ చారీజీ ప్రభావం. 

వారిని 1990 లో మొట్టమొదటిసారి చూడక ముందు, నాలో వేల సంఖ్యలో ప్రశ్నలతో వేధింపబడుతూ ఉండేవాడిని; వారిని మొట్టమొదటిసారిగా దర్శించిన వెంటనే నాలో అన్ని ప్రశ్నలకూ ఒకేసారి సమాధానం దొరికినట్లు, అపూర్వమైన శాంతిని అనుభూతిని పొందాను. ఆ క్షణమే నాకు తెలియకుండానే ఇక వీరితోనే నా జీవితం అన్న దృఢసంకల్పం జరిగిపోయింది. ఆ తరువాత ఇక వెనక్కి తిరిగి చూసింది లేదు. బహుశా ఇటువంటి అనుభూతే చాలా మంది సాధకులకు కూడా కలిగి ఉంటుందని నా ప్రగాఢ విశ్వాసం. ఈ జనారణ్యంలో సరైన గురువును కనుగొన్న మధురాతి మధుర క్షణం అది. 

బాబూజీని ప్రత్యక్షంగా చూడని అభ్యాసులకు ఆ వెలితిని పూజ్య చారీజీ తన జీవన శైలి ద్వారా, బాబూజీ బోధల ద్వారా, బాబూజీ ఛలోక్తుల ద్వారా, అఅబూజీ అద్భుతమైన హావభావ అనుకరణాల ద్వారా, పూడ్చఏవయారు; సాక్షాత్తు బాబూజీనే దర్శింపజేసేవారు.  ఆయన పలికిన ప్రతీ వాక్యంలోనూ బాబూజే అన్న పదం తప్పనిసరిగా ఉండేది. సరిగ్గా బాబూజీ కూడా లాలజీని ఇలాగే స్మరిస్తూండేవారట. ఇది కూడా చారీజీ ద్వారానే తెలిసింది. ఆ విధంగా బాబూజీ యొక్క సరళత్వం, స్వచ్ఛత యొక్క ప్రస్తుత అభ్యాసులకు అనుభూతి కలిగేది. తద్వారా పూజ్య చారీజీ అభ్యాసుల హృదయాలలో నిర్మించవలసిన ఆధ్యాత్మిక సౌధాలకు చక్కటి పటిష్ఠమైన ప్రేమ పునాడీని వేయడం జరిగింది. దాని పైన ప్రస్తుత మాస్టర్ పూజ్య దాజీ ఆధ్యాత్మిక సౌధాన్ని నిర్మించే పనిలో నిమగ్నమై ఉన్నారు.