(☝పైన లింక్ క్లిక్ చేయండి, దాజీ పై చిన్న వీడియో వీక్షించండి)
పూజ్య దాజీ 70 వ జన్మదినోత్సవం - 2025
ఈ సెప్టెంబర్ 28న పూజ్య గురుదేవులు దాజీ 70 వ జన్మదినోత్సవం, కాన్హా శాంతి వనంలో మనందరమూ జరుపుకోబోతున్నాం.
ఈ మహాత్ముడు గుజరాత్ రాష్ట్రంలో 1956 వ సంవత్సరంలో జన్మించడం జరిగింది. వీరిలో మొదటి నుండి, భగవంతుని కోసం నిరోధించలేని ప్రబలమైన తపన కలిగి ఉండేవారు. కొంచెం ఊహ వచ్చిన తరువాత శ్రీరామకృష్ణ కథామృతం అనే గ్రంథాన్ని చదువుతూ తన్మయత్వం చెందుతూండేవారు. కంటి నుండి అశ్రువులు కారుతూ ఉండేవి. స్వామి వివేకానందలా తయారవ్వాలన్న తీవ్ర ఆకాంక్ష ఉండేదట. సన్న్యాసిగా మారదామని ఇంట్లో నుండి బయల్దేరారట కూడా. హిమాలయాలలో తపస్సు చేసినటువంటి ఒక 80 యేళ్ళ సాధువు సలహాతో ప్రభావితమై ఆ ప్రయత్నాన్ని విరమించుకున్నారు. ఆ తరువాత తనకు తోచినట్లుగా మార్గదర్శనం లేకుండా ధ్యానం చేస్తూండటం చూసి, ఒక స్నేహితుడు, ధ్యానం పద్ధతిగా నేర్చుకునేందుకు సహజమార్గ ప్రశిక్షకురాలైన శ్రీమతి ద్రౌపదీ బెహన్ గారి వద్దకు తీసుకువెడతాడు. ఆమె "ధ్యానం ఎందుకు చేయాలనుకుంటున్నావు?" అని అడుగుతారు. దానికి దాజీ "నేను స్వామి వివేకానందలా తయారవ్వాలనుకుంటున్నాను" అని జవాబిచ్చారట. "దానికి సన్న్యాసి గా తయారవ్వాల్సిన అవసరం లేదు. మగ, ఆడ అని ఇద్దరినీ సృష్టించడానికి భాగ్యవంతుడేమీ మూర్ఖుడు కాదు" అని అంటారామె. ఈ వాక్యం దాజీని బాగా ప్రభావితం చేస్తుంది. ఆ తరువాత ఆమె ద్వారా మొదటి ధ్యాన సిట్టింగ్ తీసుకుంటారు. దాజీకి ఆ ధ్యానంలో శ్రీరామకృష్ణ పరమహంస, బంగారు ఛాయలో ఆశీర్వదిస్తున్నట్లుగా ఒక దివ్యమైన అనుభూతి కలుగుతుంది. ధ్యాన సిట్టింగ్ నిర్వహించిన ద్రౌపదీ బెహన్ గారికి కంటి నుండి అశ్రువులు ధారలుగా రావడం ప్రారంభించాయట. ఆమె పరవశించి, ఆశ్చర్యానికి గురై, "నీకు మిగిలిన రెండు సిట్టింగులు అహమ్మదాబాదులో అనుభవుజ్ఞులైన ప్రశిక్షకులు ఒకాయన ఉన్నారు; ఆయన వద్దకు వెళ్ళు" అని పంపించారట. ఆ విధంగా వారికి సహజ మార్గంలో 1976 లో ప్రవేశించడం జరిగింది. ఆ సమయంలో వారు ఫార్మసీ చదువుతున్నారట. వారితోపాటు నెమ్మది-నెమ్మదిగా వారి తోటి విద్యార్థులు, అధ్యాపకులు కూడా ఈ ధ్యానాన్ని ప్రారంభించి నిత్యం సాధన కూడా క్రమం తప్పకుండా చేస్తూండేవారట.
సశేషం ...
adbhutamgaa parichayam chesaaru Krishna ji.
రిప్లయితొలగించండి